Magsisimbang gabi, binatilyo dinedo
MANILA, Philippines – Hindi na nakarating sa simbahan para sa Simbang Gabi ang isang binatilyo makaraang barilin at mapatay ng kanyang kapitbahay, kahapon ng madaling araw sa Malabon City.
Hindi na umabot ng buhay dahil sa tama ng bala sa ulo sa Tondo Medical Center ang 17-anyos na si France Welmor Parohinog, nasa 1st year ng Tañong National High School at residente ng Pinagsabugan Street, Brgy. Longos, ng naturang lungsod.
Pinaghahanap naman ngayon ang tumakas na suspek na nakilalang si Jonathan Gadon, alyas Pimpoy, residente rin ng naturang lugar.
Sa ulat ng pulisya, naganap ang pamamaril dakong alas-3:40 ng madaling araw sa may Pinagsabugan Street. Naglalakad umano ang biktima para mag-Simbang Gabi nang lapitan ng suspek.
Pinagbintangan ng suspek ang biktima na siyang namamato sa kanyang bahay hanggang sa mauwi sa pagtatalo. Dito nagbunot ng baril ang suspek at pinaputukan ng isang beses sa ulo ang binatilyo.
Agad na sinaklolohan ng mga kaanak ang biktima at isinugod sa pagamutan habang tumakas na ang suspek.
- Latest
