MANILA, Philippines – Lasog ang katawan at agad na binawian ng buhay ang isang 20-anyos na factory worker nang masagi ng passenger train ng Philippine National Railways (PNR) habang dala-dala ang mga napulot na panggatong sa bahagi ng Kahilum, Pandacan, Maynila, sa ulat kahapon.
Nasa 20 metro ang binagsakan ng tumilapong biktimang si Mark Jeb Gomez, residente ng Kahilum I , Pandacan, Maynila na nagresulta sa kaniyang kamatayan.
Sa ulat ni SPO3 Hipolito Borigas ng Manila Police District-Station 10, dakong alas-9:40 ng umaga nang maganap ang insidente sa riles malapit sa Kahilum I, Pandacan.
Habang naglalakad umano ang biktima at pinsan nito mula sa pamumulot ng panggatong na kahoy sa bahagi ng Osmeña Highway ay nasagi ng rumaragasang tren na pabalik sa Tutuban.
Sinabi ng makinista na kinilalang si Dominador Mendoza hindi niya agad napansin na nasagi ng tren ang biktima.