MANILA, Philippines - Sugatan ang isang 15-anyos na high school student nang pagsasaksakin ng 2 kapwa babaeng estudyante sa Tondo, Maynila, kamakalawa ng gabi.
Ginagamot sa Gat Andres Bonifacio Memorial Medical Center ang biktimang itinago sa pangalang Aya, ng Raja Soliman Science and Technology High School sa Tondo at residente ng Parola compound.
Dalawang dalagita na pinangalanang Irish at Angelica naman na kapwa high school student din sa nasabing paaralan ang pinaghahanap ng mga awtoridad makaraang tumakas matapos ang ginawang pananaksak gamit ang icepick sa biktima.
Sa ulat ni P/Chief Insp. Rennie Geronimo, ng Manila Police District-station 2, naganap ang insidente dakong alas-7:30 ng gabi. Unang nagkabugbugan umano ang biktima at 2 suspek sa Matimtiman St. sa Tondo hanggang sa bumunot ng icepick ang isang suspek at sinaksak sa kaliwang braso at likod ang biktima.
Tumakas ang dalawa nang makitang duguan na ang biktima na sinaklolohan naman ng mga nakasaksi at dinala sa pagamutan.