MANILA, Philippines - Utas ang isang 23-anyos na lalaki nang tarakan sa leeg ng security guard na tinawag ng una na ‘Andres de saya’ sa Tondo, Maynila, kahapon ng madaling araw.
Dead-on-arrival sa Gat Andres Bonifacio Memorial Medical Center (GABMMC) ang biktimang si Reymalon Azuelo, 23. Tinutugis naman ng Delpan Police Community Precint (PCP), ang suspek na si Patrick dela Paz, 25, kapitbahay ng biktima.
Ayon sa report dakong alas-2:30 ng madaling araw ng maganap ang insidente. Nabatid na bagong dating lamang umano ang biktima sa inuman at niyaya siya hanggang sa napatagay na. Hindi pa nagtatagal ay dumating naman ang misis ni dela Paz at pinauuwi na ito na naririnig ng mga kainuman kaya kinatiyawan siya na ‘under’.
Napahiya ang suspek at dahil nakainom na ay hindi na nagdalawang-isip na kunin ang nakasukbit na patalim sa beywang at mabilis na sinaksak sa leeg ang biktima at nagmadaling lumayo.
Pinaghahanap na ang suspek para sa kasong ihaharap laban sa kaniya.