MANILA, Philippines – Dalawang Japanese national na katatapak pa lamang sa lupa ng bansa ang nabiktima ng sinakyang taxi driver na nagtatakbo ng bagahe, sa Malate, Maynila, kahapon ng madaling araw.
Sa reklamo na inihain kay PO3 Jay Jacob ng Manila Police District-General Assignment and Investigation Section (MPD-GAIS) ng mga biktimang sina Kawashina Yuki, 29 at Shingo Kumagawa, 28, kapwa tubong Konagawa, Japan, dalawang backpack ang naitakbo ng di naplakahang taxi dakong ala 1:30 ng madaling-araw kahapon sa tapat ng Sogo Hotel, sa Malate.
Mula umano sa pagdating nila sa Ninoy Aquino International Airport (NAIA) ay sinakyan nila ang nasabing taxi at nagpahatid sa Sogo Hotel.
Nang bumaba umano sila ay mabilis na pinasibad ng taxi driver ang sasakyan kaya hindi na nila nakuha ang iba pang mga dala-dalahan kabilang ang dalawang malalaking bag.
Kabilang sa mahalagang gamit na natangay ang Galaxy Note Edge, Canon ca-mera at iba’t ibang lenses bukod sa mga personal na gamit.