Beybi, itinapon sa footbridge

MANILA, Philippines - Isang sanggol na nasa pagitan ng pito o walong buwan ang natagpuang bangkay na nakabalot sa isang sako ng basura matapos itapon sa footbridge sa lungsod Quezon.

Ayon kay PO2 Shun Patrick Petuco,  wala namang nakitang anumang sugat sa katawan ng sanggol nang matagpuan sa footbridge sa kahabaan ng Luzon Avenue, kanto ng Commonwealth Avenue­, Brgy. Culiat.

Nadiskubre ang nasabing nilalang ng isang grupo ng mga paslit na lalaki na naglalakad sa naturang footbridge.

Nang kanila itong buksan ay saka nabatid ang naagnas nang bangkay ng sanggol na natatabunan ng kulay brown na tela.

Sinasabing tatlong araw nang nakikita ang sako na nakatambak sa nasabing footbridge. (Ricky T. Tulipat)