Pekeng police major, arestado
MANILA, Philippines – Isang lalaki ang dinakip matapos itong magpanggap na opisyal ng pulis para lamang makakuha ng diskwento sa pamimili nito sa isang shopping mall sa Pasay City, kahapon.
Kinilala ang suspek na si Dannie Ting, 47, ng Masangkay St., Sta. Cruz, Manila.
Nakasuot pa ang suspek ng police uniform na may ranggong chief inspector o major, kung kaya’t na-wow mali ang ilang pulis sa Pasay City Police headquarters at sinaluduhan pa ito.
Base sa report na natanggap ni Senior Supt. Sidney Sultan Hernia, Officer-In-Charge ng Pasay City Police, naganap ang insidente alas-8:30 ng umaga sa Bagong Melenio Shopping Mall sa Taft Avenue, Brgy. Baclaran ng naturang lungsod.
Nabatid na namataan ng ilang negosyanteng may pwesto sa naturang mall ang suspek at naka-uniporme pa ito dahilan upang itawag nila ito sa himpilan ng Police Community Precinct (PCP) 6 na nang respondehan ay nadiskubre na peke ang suspek.
Katwiran ng suspek, kaya aniya siya nagpanggap na pulis ay upang makakuha ng diskwento sa kanyang pamimili.
- Latest
