MANILA, Philippines - Isang lalaki ang naaresto ng Manila Police District-Plaza Miranda PCP matapos na mahulihan ng baril sa Sta. Cruz, Maynila. Kinilala ni Sr. Insp. Rommel Anicete, hepe ng Plaza Miranda PCP ang suspek na si Pancho Villano, 39, tricycle driver at naninirahan sa Blk. 11 Lot 39 Inocencio St., Trece Martirez, Cavite.
Ayon kay Anicete, alas-6 ng umaga ng Enero 12 nang nagsasagawa ng pagpapatrol ang kanyang mga tauhang sina SPO2 Edwin Membrado, PO1 Christopher Duran at PO1 Hanny Mark Salamanca sa panulukan ng C.M. Recto Ave. at Evangelista St., Sta. Cruz, Manila.
Napansin ng kanyang mga tauhan si Villano na nakatayo sa nabanggit na lugar at ang nakabukol sa kanyang kanang beywang. Dito na kinuwestiyon ni Membrado ang suspek at nakuha ang isang .38 caliber revolver hand gun na may bala habang nasa back-up naman sina Duran at Salamanca.
Subalit sa kanilang beripikasyon lumilitaw na may nakabinbing warrant of arrest si Villano sa Manila Regional Trial Court dahil sa kasong murder. (Doris Franche-Borja)