MANILA, Philippines – Kapwa nasawi ang magkapatid kabilang ang dalawang buwang sanggol nang masunog ang kanilang barung-barong sa Yuseco St., sa Tondo, Maynila.
Dead on arrival dakong alas-2:30 ng madaling araw ang beybi na si Anna Marie habang ang ate nito na si Princess Apple Tolentino, 5, ay binawian ng buhay dakong alas-6:30 ng umaga, batay sa nakuhang report sa Jose Reyes Memorial Medical Center (JRMMC).
Ang mga biktima ay nakatira lamang umano sa kubol o barung-barong na itinayo sa gilid ng riles sa Yuseco at Batangas Sts., sa Tondo.
Hanggang alas-6:00 ng gabi kahapon ay wala pang ulat o impormasyon ang Manila Fire Bureau at Arson Division ukol dito. Nabatid na alas-2:00 ng madaling araw nang maganap ang sunog dahil sa iniwang nakasinding kandila.
Nabatid na naiwan sa barung-barong ang magkapatid makaraang umalis ng bahay ang kanilang ina na si Josephine, 34, labandera.
Para bumili lang ng pagkain. Maliit lamang ang sunog at walang iba pang bahay na nadamay.