Manhole ng mga kawatan, buking
MANILA, Philippines - Isang manhole na pinaniniwalaang gawa ng ‘acetylene gang’ ang nadiskubre ng isang vendor kaya naagapan ang posibleng panloloob sa mga nakahilerang pawnshop sa Ongpin St., Binondo, Maynila, kamakalawa ng hapon.
Sa ulat ng Manila Police District station 11, kamakalawa ay ininspeksiyon ni Emerson Chua, ng stalls R at U ng China City Gold Center ang nakarating sa kanyang impormasyon hinggil sa hukay na patungo sa loob ng jewelry center at mismong nasa tapat ng kanyang stalls, na kasyang daanan ng tao.
Ito’y kaugnay din sa inireport sa Ongpin Police Outpost ng isang Analiza David, 29, vendor, noong Setyembre 9, 2014, hinggil sa paghuhukay sa ilalim ng nasabing mga tindahan ng mga kalalakihan na pawang nakasuot umano ng t-shirts na kulay blue.
Nang makipag-ugnayan sa building administration ang pulisya, binalewala umano ito at hindi na natuloy ang imbestigasyon.
Nang alamin ng pulisya sa City Engineer’s Office, nalaman na walang anumang proyekto kaugnay sa paghuhukay sa nasabing kalye patungo sa ilalim ng jewelry center.
Inaalam na rin ng CEO ang kondisyon ng lupang hinukay ng mga suspek, na posiblidad na lumikha pa ng panganib.
- Latest
