MANILA, Philippines - Patay ang isang taxi driver makaraang barilin sa ulo ng hindi nakikilalang salarin habang nagpapa-repair ang una ng stereo ng kanyang sasakyan sa lungsod Quezon, iniulat kahapon.
Kinilala ni PO2 Julius Balbuena, ang biktima na si Franklin Mercader, 45, ng Veterans Village, Brgy. Pasong Tamo sa lungsod.
Ayon kay Balbuena, ang biktima ay binaril ng hindi natukoy na suspek sa harap ng Inson’s store na nasa kahabaan ng Aurora St., Area 5, Veterans Village, ganap na alas-11:50 ng umaga.
Base sa pahayag ni Roberto Caro, sisimulan pa lamang niyang ayusin ang pinagagawa ng biktima na stereo ng kanyang taxi (TYN-770) nang makarinig siya ng putok ng baril malapit sa lugar.
Nang kanyang tingnan ay bumulaga sa kanyang harapan ang duguang katawan ng biktima kaya agad niya itong iniulat sa barangay na siyang tumawag ng pulisya.
Sa pagsisiyasat ng awtoridad, narekober sa lugar ang isang basyo ng kalibre .45 baril at isang tingga nito.
Patuloy ang imbestigasyon ng pulisya sa nasabing insidente.