MANILA, Philippines - Isang dispatcher ang nasawi matapos itong pagbabarilin ng riding-in-tandem na suspects habang sugatan naman ang isang motorista na tinamaan ng ligaw na bala, kahapon ng madaling-araw sa Taguig City.
Dead on the spot ang biktimang si Joseph Hondal, ng Palar Village ng naturang lungsod sanhi ng tinamong mga tama ng bala ng baril sa katawan .
Samantala, hindi agad nakuha ang pangalan ng motorista na tinamaan ng ligaw na bala at ginagamot ngayon sa Ospital ng Makati.
Lumalabas sa report na natanggap ng Taguig City Police, naganap ang insidente alas-12:00 ng madaling-araw sa north bound lane ng C-5 Road, Brgy. Palar Village ng naturang lungsod habang naglalakad ang nasawi nang sumulpot ang mga suspect lulan ng motorsiklong walang plaka at walang sabi-sabing pinaulanan ng bala ang una.
Pagkatapos nito ay mabilis na tumakas ang mga suspect habang patuloy pa rin ang isinasagawang imbestigasyon sa kaso.