MANILA, Philippines - Patay ang isang negosyanteng Tsinay nang tambangan ng riding in tandem habang sakay ng kaniyang Starex van, sa Sampaloc, Maynila, kamakalawa ng hapon.
Si Mary Li, 58, ng Greenmeadows, Quezon City at may-ari ng isang kilalang fastfood ay idineklarang dead on arrival sa Ospital ng Sampaloc bunga ng dalawang tama ng bala sa ulo at pisngi.
Dalawang lalaki na magka-angkas umano sa motorsiklong walang plaka, na kapwa nakasuot ng helmet ang sinasabing responsable sa ambush.
Sa ulat ni SPO3 Rodelio Lingcong ng Manila Police District-Homicide Section, dakong alas-5:10 ng hapon nang maganap ang insidente sa Vicente Cruz St., Sampaloc.
Sakay umano ang biktima ng nasabing van kasama ang isang kaibigang branch manager din na si Arlene Rizano, 27 na minamaneho ng kaniyang driver na si Ruel Dumdum, 36 nang dikitan ng mga suspek na nakamotorsiklo ang bahagi ng kinauupuan ng biktima.
Dito na pinuntirya ng suspek si Li kung saan dalawang tama ng bala ng baril sa ulo at pisngi ang ibinaon.
Hindi naman idinamay ang driver at ang kasamang si Rizano.
Walang tinangay na anuman mula sa biktima ang mga suspek na nagmadaling tumakas sa direksiyon ng Lardizabal St.