5-anyos lasog sa gasoline tanker
MANILA, Philippines - Isang 5-anyos na batang babae ang nasawi habang dalawang iba pa ang nasugatan matapos silang maatrasan ng isang gasoline tanker malapit sa isang gasolinahan kamakalawa sa Pasig City.
Idineklarang dead-on-arrival sa Rizal Medical Center ang biktimang si Jovielyn Virana, ng Dr. Sixto Antonio Ave., Brgy. Caniogan sanhi ng tinamong matinding pinsala sa ulo at katawan.
Sugatan naman ang mga kapitbahay nitong sina Danilo Romagat, 41, at Nerissa Monteporo, 66.
Sumuko sa pulisya ang driver ng gasoline tanker na si Junval Orialla, 35.
Sa imbestigasyon ni PO3 Gil Pedera, alas-7:30 ng gabi, inilalagay ni Orialla ang kargang gasolina sa isang gasoline station na matatagpuan sa Dr. Sixto Antonio Avenue at nang matapos ay inalis nito ang ikinalsong bato dahilan sa mabilis na pag-atras ng tanker.
Nabatid na kalaro ni Virana ang kapwa niya bata sa tapat ng kanilang bahay habang ang dalawang kapitbahay ay nag-uusap sa bangketa nang mahagip sila ng umatras na tanker.
- Latest
