Sinasakyang motorsiklo sumemplang joyride ng 3 coed: 2 patay
MANILA, Philippines - Nauwi sa trahedya ang ginawang joyride ng tatlong coed makaraang sumemplang ang sinasakyan nilang motorsiklo kung saan dalawa sa kanila ang nasawi, habang sugatan pa ang isa sa San Miguel, Quiapo, Maynila, kamakalawa ng gabi.
Dead-on-the-spot ang mga biktimang sina Sheranebeth Ocampo, 20, estudyante ng Philippine College of Health and Sciences Inc. at Jenee Anne Lingal, estudyante ng National Teachers College.
Sugatan naman at ginagamot sa Philippine General Hospital ang isa pang angkas na si Jane Margarita Lastrollo, 21, estudyante din ng National Teachers’ College.
Sa ulat ni SPO1 Bert Francisco ng Manila Traffic Enforcement Unit, dakong alas-11:00 ng gabi kamakalawa nang maganap ang insidente sa may Ayala Bridge.
Mabilis umano ang pagmamaneho ni Ocampo sa Kawasaki (6066-HZ) habang angkas nito sina Lingal at Lastrollo nang sumemplang dahil sa madulas na daan.
Sinasabing humampas sa gutter ang ulo ni Ocampo, habang ang dalawa nitong angkas ay tumilapon at lumagapak naman sa bangketa.
Nang respondehan, nakitang buhay pa si Lastrollo na dinala naman sa pagamutan.
Batay din sa ulat, pawang nakainom ang tatlo na posibleng dahilan din kaya hindi nakontrol ni Ocampo ang pagmamaneho.
- Latest
