MANILA, Philippines – Nauwi sa karahasan ang pagtatalo ng dalawang security guard, kung saan patay ang isa sa lungod ng Makati ngayong Huwebes.
Nakilala ang suspek na si Dante Bacalan at ang nasawi na si Allan Quides na kapwa nagtatrabaho para sa Soliman security agency.
Pauwi na sana si Bacalan na papalitan naman ni Quides nang maganap ang insidente sa Urban Bank sa panulukan ng kalye ng Durban at Makati Avenue sa Barangay Poblacion ganap na 6:58 ng umaga.
Binaril ni Bacalan si Quides gamit ang kalibre .38 na revolver matapos ang kanilang mainit na pagtatalo.
Tinamaan sa dibdib si Quides na ikinamatay nito kaagad.
Nabawi ng mga rumespondeng pulis ang baril kay Bacalan na ngayon ay nakakulong sa Makati Police headquarters.
Inihahanda na ng mga awtoridad ang isasampang kaso laban sa guwardiya.