2 utas sa pagguho ng pader sa QC

MANILA, Philippines - Dalawa ang patay matapos mabagsakan ng gumuhong pader ng isang warehouse sa Quezon City kagabi, kung saan anim na jeep ang natabunan.

Nakilala ang mga biktimang sina Norma Magada, 44, at Robin Leuterio, 22, na kapwa nasawi sa pagbagsak ng pader ng L.G. Atkinson warehouse.

Ayon sa pangunang imbestigasyon, nangyari ang insidente sa kalye ng Malasimbo sa Barangay Masambong bandang 8:30 ng gabi.

Natabunan ang bangkay ni Leuterio ng mga gumuhong tipak ng bato, habang nasa loob ng isa sa mga jeep ang katawan ni Magada.

Inaayos ang naturang warehouse nang maganap ang insidente.

Inaalam na ng mga awtoridad kung anong kaso ang maaaring isampa sa may-ari ng gusali.