MANILA, Philippines - Natagpuang patay ang isang 53-anyos na caretaker ng gusali ng Department of Public Works and Highways (DPWH) sa Bonifacio Drive, Port Area, Manila, kahapon ng umaga.
Nakadapa sa sahig at hindi na gumagalaw ang biktimang si Ricardo Guarino, stay-in, tubong Pagsanjan, Laguna nang mapansin ng janitress na si Annalyn de la Cruz.
Pumasok umano sa employees barracks si de la Cruz para magpalit ng kanyang uniporme dakong alas- 8:00 ng umaga kahapon nang makita niya ang nakadapang biktima sa sahig.
Nagtaka siya kung bakit nasa sahig kaya nilapitan at doon niya nahawakan na matigas at malamig na ang katawan.
Hinihinalang inatake sa puso ang biktima at bumagsak ito sa sahig.
Inilagak na sa Nathan Funeral Parlor ang labi ng biktima para sa awtopsiya at safekeeping.