MANILA, Philippines - Utas ang isang rider nang barilin ito ng hindi pa kilalang suspek na nakasakay sa isang Sport Utility Vehicle (SUB) habang pinaparada ng una ang kanyang motorsiklo, kahapon ng madaling araw sa Pasay City.
Dead-on-arrival sa Pasay City General Hospital ang biktimang si Rosendo Castillo, 44, residente ng M. Delos Santos St., ng naturang siyudad, nagtamo ito ng tama ng bala sa tadyang buhat sa kalibre .45 baril.
Inaalam pa ng pulisya ang pagkakakilanlan ng suspek at nagsasagawa pa ng follow-up laban dito.
Lumalabas sa report na natanggap ni Police Chief Inspector Joey Goforth, hepe ng Investigation Division ng Pasay City Police, naganap ang insidente ala-1:00 ng madaling araw sa panulukan ng Tolentino at Protacio Sts., ng naturang siyudad habang pinaparada ng biktima ang kanyang motorsiklo nang sumulpot ang isang SUV na hindi naplakahan.
Mula doon ay bumaba ang suspek at walang salitang binaril ang biktima. Matapos ang pamamaril ay mabilis na tumakas ang suspek.
Blangko pa ang pulisya sa motibo sa naganap na krimen.