MANILA, Philippines - Binaril sa ulo at namatay noon din ang isang vendor habang nagtutulak ng kanyang kariton sa Batasan Hills, Quezon City kahapon ng umaga.
Kinilala ang biktima na si Jerry Alario, 40, buko vendor ng Lower Jasmin, Brgy. Payatas,QC.
Ayon kay PO2 Jayson Tolentino ng Quezon City Police District-Station 6 naganap ang insidente sa kahabaan ng Commonwealth Avenue, cor. Kalayaan, Brgy. Batasan Hills, sa lungsod dakong alas-6:45 ng umaga.
Sinasabing noong panahong iyon, habang nagtutulak ng kanyang kariton na may lamang panindang buko ang biktima nang biglang lapitan ng hindi pa kilalang suspek at walang sabi sabing binaril sa ulo ang biktima.
Nang makitang humandusay sa kalye ang biktima, agad namang tumakas ang suspek sa lugar. Patuloy ang isinasagawang imbestigasyon ng pulisya ukol dito.