Kelot tinadtad ng bala, itinapon sa basura

MANILA, Philippines - Isang lalaki na tinadtad ng bala sa katawan ang na­tagpuan sa kumpol ng basura sa Tondo, Maynila, kama­kalawa ng gabi.

Hindi na umabot pang buhay sa Gat Andres Boni­facio Memorial­ Medical Center (GABMMC) ang biktimang kinilalang si Richard Dela Cruz, ng Intramuros, Maynila bunga ng mga tama ng bala na tinamo sa katawan.

Wala namang makapagsabi kung sino ang salarin, na pa­tuloy pang iniimbestigahan.

Sa ulat ni SPO2 Rodelio Lingcong ng MPD-Homicide Section, dakong  alas-9:10 ng gabi nang madiskubre ang nakahan­dusay na biktima sa tabi ng tambakan ng basura sa tapat ng  Gate 16, Parola Compound, Tondo.

Sa naging pahayag ng 16-anyos na si Jeremy Ro­mero,  resi­dente ng Area H, Parola Compound, napansin niya ang katawan ng biktima nang mapadaan siya at nang makitang duguan ay dinala ito sa pagamutan.

Ang Parola, tulad ng Baseco na magkatabi lamang ay na­ngunguna sa lugar na may mataas na insidente ng patayan na halos araw-araw ay naitatala sa MPD-Homicide Section.