MANILA, Philippines - Ang aking appointment ay co-terminus ni Manila Mayor Joseph Estrada.
Ito naman ang binigyan diin ni Unibersidad de Manila President Dr. Benjamin Tayabas bunsod na rin ng pagkondena at pagkuwestiyon ng faculty ng nasabing unibersidad sa kanyang pagkakatalaga.
Batay sa sulat ni Tayabas, ang kanyang ‘term appointment’ ay bunsod na rin ng appointing authority ni Estrada at hindi ‘regular appointment’ na nakasaad sa Civil Service Commission. Nangangahulugan din lamang ito na hindi ito covered ng ‘age requirement’.
Sinabi pa ni Tayabas na nakapanumpa din siya kay Estrada at ang lahat ng kanyang responsibilidad bilang pangulo ng UDM ay may basbas ng Board of Regents ng unibersidad.
Idinagdag pa ng UDM president na maayos na ang kanyang kalusugan at maaari nang magtrabaho batay sa medical certificate na ibinigay ng kanyang doctor na si Eugenio Reyes, MD FPCP, FPCC.
Nakakalungkot lamang ayon kay Tayabas na sa pagnanais niyang maayos ang pamamalakad at sistema sa UDM ay siya ang ginagawang ng kontrobersiya samantalang nakakagulat din ang kanyang natuklasang ‘extra load’ ng mga guro na umaabot mula P10,000-P33,000 bukod pa sa regular na mga sahod nito buwan-buwan. May iba ring guro na bukod sa ‘regular load’ o monthly salary at ‘extra load’, may nakatala pang ‘other load’ sa ilang guro na ayon kay Tayabas ay kuwestiyonable.
Aminado naman si Tayabas na maaaring ibigay ang mga ‘extra pay’ kung nakikita na tumataas ang kalidad ng edukasyon sa UDM.