MANILA, Philippines - Nahaharap sa kasong possession of illegal drugs ang isang commercial model makaraang mahulihan ng shabu nang dumalaw sa kanyang live-in-partner na nakakulong sa PDEA headquarter sa Quezon City, kamakalawa.
Kinilala ang suspek na si Charmie Cruz, 22, dalaga, freelance commercial model at nakatira sa Sta. Isabel St., Samploc, Manila.
Si Cruz ay nakapiit ngayon sa detention cell ng Philippine Drug Enforcement Agency makaraang makumpiskahan ng sachet ng shabu ng mga awtoridad.
Sinasabing dakong alas - 2:30 ng hapon, dadalaw umano si Cruz sa ka-live-in na si Manuel Cafranca na nakapiit sa himpilan ng PDEA dahil sa kasong drug pushing.
Standard operating procedure na lahat ng dadalaw sa mga nakakulong sa ahensiya ay sinisiyasat at nang kinakapkap an ni Agent 101 Florian Rose Medica si Cruz ay nahulihan ng sachet ng shabu sa tsinelas.
Sa puntong ito, agad dinakip ni Agent Medica ang modelo at saka ikinulong noon din sa detention cell ng PDEA.