MANILA, Philippines - Isang holdaper ang malubhang nasugatan nang sumemplang ito sa motorsiklong minamaneho habang papatakas matapos holdapin ang isang negosyante at ilang kostumer sa isang lugawan sa Caloocan City kamakalawa.
Ginagamot sa Jose Rodriguez Hospital sanhi ng pinsala sa ulo at katawan ang suspek na si Lordnin Gandalan, 32, ng Everlasting St., Camarin ng naturang lungsod.
Ayon kay Supt., Ferdie Del Rosario, ng Caloocan City Police, naganap ang insidente alas-4:00 ng hapon sa isang lugawan sa Alma Jose St., Camarin ng naturang lungsod.
Nabatid na habang kumakain ng lugaw ang negosyanteng si Benjie Angeles, 27 at dalawa pang kostumer nang lapitan ito ng suspek kasama ang isa pang suspect saka tinutukan ng baril ang mga biktima at nagdeklara ng holdap.
Kinuha ng mga suspek ang alahas ng mga biktima na aabot sa P15,000 at cash na P3,000 bago nagsitakas ang mga ito sakay ng motorsiklo. Hinabol ng mga biktima sakay ng sasakyan ang mga suspek at sa pagmamadali ay kapwa sumemplang ang naturang mga holdaper, subalit malubhang nasugatan si Gandalan na naging dahilan upang madakip ito nang rumespondeng mga pulis at dinala ito sa naturang ospital at mabilis namang nakatakas ang hindi kilalang kasama nito.
Nabawi ng mga pulis ang Suzuki Raider at Racal na parehong walang plaka, isang kalibre .45 mula sa suspek at nadala naman ng kasama nito ang mga nakulimbat nila sa mga biktima.