MANILA, Philippines - Isang inspector ng pampublikong palengke ang pinagbabaril at napatay sa Barangay Commonwealth kahapon ng umaga, ilang araw matapos na paslangin din ng dalawang armado ang kasamahan nitong ginang na market collector sa lungsod Quezon.
Ayon sa inisyal na ulat ng Quezon City Police Station 6, nakilala ang biktima na si Roger Pineda, 38, market insÂpector sa Commonwealth Market, sa Brgy. Commonwealth sa lungsod.
Bukod kay Pineda, sugatan din ang apat na taong gulang na si Kate Winslet Villena, matapos talsikan ng basyo ng bala sa gilid ng kanyang kanang mata. Agad din itong dinala sa malapit na clinic para malapatan ng lunas.
Sabi ni PO3 Laila Agati ng Police Station 6, si Pineda ay pinagbabaril ng dalawang lalaki na kapwa armado ng kalibre 45 baril.
Nangyari ang insidente sa may looban ng Steve St., ganap na alas- 9:45 ng umaga. Diumano, kagagaling lamang umano ng biktima sa loob ng palengke kung saan siya nagtatrabaho at naglalakad papauwi sa naturang lugar nang biglang lapitan ito ng dalawang suspect at pagbabarilin.
Matapos ang pagpatay, ay naglakad lamang umano papalayo ang mga salarin na parang walang nangyari.
Sinasabing si Pineda umano ay kasamahan nang nauna nang pinaslang na administrative staff-collector na si Rosario Tortoles, 52 sa naturang palengke noong nakaraang Biyernes.
Patuloy ang imbestigasyon ng awtoridad sa nasabing insidente na posible umanong may kinalaman sa trabaho ang ugat ng pagpatay. Inaalam din kung iisa ang pumaslang kay Tortoles at kay Pineda.