Binata utas sa suntok ni kuya

MANILA, Philippines - Isang 41-anyos na binata ang nasawi  nang  suntukin ito  ng nakatatanda nitong  kapatid kamakalawa sa Malabon City.

Hindi na nakarating ng buhay nang dalhin sa Pagamutan Bayan ng Malabon  si Francisco Domingo, miyembro ng Civil Security­ Unit ng Malabon City Hall at re­sidente ng Leonio St. ng nasabing barangay.

Pinaghahanap naman ng mga awto­ridad ang kuya nito na suspek na si Roby Domingo, 49,  mekaniko, ng Borromeo St., Brgy. Longos, Malabon City.

Base sa isinagawang imbestigasyon ni SPO4 Ferdinand Espiritu, naganap ang insidente dakong alas-5:30 ng hapon sa nasabing lugar.

Nauna rito, nagkaroon ng mainitang pagtatalo ang magkapatid hanggang sa biglang umalis ang suspek sakay ng kanyang van.

Ilang sandali pa ay  bumalik ang suspek at nakita nito ang biktima na naghihintay  ng sasakyan patungong Monumento.

Nilapitan ng suspek ang nakababatang kapatid at saka biglang  sinuntok  sa dibdib.

Agad na nanikip ang dibdib ng biktima at hindi na umabot pang buhay nang isugod sa pagamutan.

Mabilis namang tumakas ang utol nito.

Hindi pa malinaw sa pulisya kung ano ang dahilan ng pag-aaway ng magkapatid.