Karnaper huli sa CCTV

MANILA, Philippines - Hindi nakalusot sa ginawang krimen ang isang karnaper makaraang maaresto ito ng pulisya matapos na mabuko ang ginawang pag­­tangay sa isang motorsiklo nang makunan siya ng closed circuit television ca­mera (CCTV), kama­kalawa ng umaga sa Pasay City.

Nadakip sa isinagawang operasyon ang suspek na nakilalang si Marvin Reyes, 20,  ng  Decena St., ng natu­rang lungsod.

Narekober naman ang tinangay nilang Suzuki Raider J motorcycle na pag-aari ng security guard na si Mark Cesar Parohinog, 29, residente rin ng naturang lungsod.

Sa ulat, dakong alas-6:12 ng umaga nang ipa­rada ng biktima ang kanyang motorsiklo sa tapat ng kanilang bahay at nang balikan niya ito makaraan ang halos kalahating oras ay nawawala na ito.

Agad nagtungo sa ba­rangay hall ang biktima upang iulat ang nasabing in­sidente. Nang tignan ang kuha ng CCTV na nakakabit sa mga kalsada sa ba­rangay, dito naispatan ang motorsiklo ng biktima na minamaneho ni Reyes.

Dito na nakipag-ugna­yan ang barangay sa pu­lisya at magkatulong na pinuntahan ang suspek sa bahay nito sanhi ng kanyang pagkakaaresto. Nahaharap ngayon ang suspek sa kasong carnapping.