Binata binistay ng bala
MANILA, Philippines - Anim na tama ng bala sa ulo at katawan ang tumapos sa buhay ng isang binata makaraang pagbabarilin ng dalawang hindi pa nakikilalang salarin sa isang eskinita sa lungsod Quezon kahapon ng madaling-araw.
Si Elmer Matubay, 23, ay nakita na lamang naliligo sa sarili nitong dugo habang walang buhay na nakasubsob sa isang eskinita, ayon kay PO2 Roldan Cornejo, may-hawak ng kaso.
Sabi ni Cornejo, walang makapagsabi kung papaano pinaslang ang biktima, dahil nakita na lamang umano ang dalawang lalaki na papalayo sa nasabing lugar makaraan ang mga putok ng baril.
Ayon sa ulat, si Matubay ay natagpuan na lamang ng residenteng si Annaliza Aguda sa may gilid ng isang bahay sa Adarna St., Brgy. Commonwealth, ganap na alas-2:10 ng madaling-araw. Sabi ni Aguda, nagbabantay siya sa kanyang tindahan nang makarinig siya ng mga putok ng baril.
Agad niyang tiningnan ang lugar para matiyak kung saan niya nakita ang bangkay ng biktima.
Agad na ipinagbigay alam ni Aguda ang nakita sa barangay na siya namang tumawag ng responde mula sa pulisya
Sa pagsisiyasat, narekober sa lugar ang tatlong piraso ng basyo ng kalibre 45 baril, isang depormadong slug at dalawang piraso ng plastic sachet na naglalaman ng hiniÂhinalang shabu.
Patuloy ang imbestigasyon ng awtoridad sa nasabing inÂsidente.
- Latest
