Taxi driver hinoldap, dinedo ng 5 pasahero

MANILA, Philippines - Sa ospital na binawian ng buhay ang isang taxi driver makaraang holdapin at saksakin sa dibdib ng kanyang limang pasahero sa lungsod Quezon, kamakalawa. Si Victor Rapis, 53, ng Tondo, Manila ay nasawi sanhi ng tinamong saksak sa dibdib. Wala namang nakasaksi sa nasabing insidente kung kaya blangko ang awtoridad sa pagkakakilanlan ng mga salarin.

Ayon sa pulisya, nalaman lamang nila kung ano ang nangyari sa biktima matapos na makapagsalita pa ito sa security guard ng ospital hinggil sa mga pangyayari, bago tuluyang bawian ng buhay. Nangyari ang insidente sa kahabaan ng Adama corner Jasmin St., Brgy. Holy Spirit, ganap na alas- 8:45 ng gabi.

Pinapasada umano ng biktima ang kanyang taxi (TWW-729) at tinatahak ang direksyon ng Sangandaan nang parahin siya ng mga suspect at nagpahatid sa direksyon ng Brgy. Holy Spirit. Pero kahit sugatan, nagawa ng biktima na imaneho ang kanyang taxi, pero nabundol naman nito ang isang tricycle na minamaneho ni Cezar Edolzora. Ang insidente ay agad na inireport sa barangay official sa lugar at nirespondehan ang biktima saka itinakbo sa FEU hospital.

Dito ay nagawa pang mailahad ng biktima sa security guard ang pangyayari, pero makalipas ang alas-11:06 ng gabi ay tuluyang idineklara din itong patay.