MANILA, Philippines - Isang 47-anyos na binata ang pinatay sa saksak ng kanyang pinsan habang ito ay nakikipag-inuman kamakalawa sa Caloocan City.
Dead-on-arrival sa President Diosdado Macapagal Memorial Medical Center sanhi ng saksak sa dibdib ang biktimang si Alfredo Tulagan, driver, residente ng Diwa St., 8th Avenue, Brgy. 59 ng nasabing lungsod.
Nasa custody naman ng Caloocan City Police ang suspek na si Mario Tulagan, 44.
Ayon sa Caloocan City Police, naganap ang insidente alas-4:40 ng hapon sa isang tindahan malapit sa bahay ng biktima sa nabanggit na lugar habang nakikipag-inuman ito sa mga kaibigan nang dumating ang suspek na pinsan. Tinapik muna sa balikat at binati pa ng suspek ang biktima bago bumunot ng patalim at sinaksak ito.
Matapos ang insidente ay sumuko sa mga pulis ang suspek habang inaalam pa ang motibo sa isinagawang pananaksak.