MANILA, Philippines - Hindi na umabot ng Pasko ang isang 28-anyos na lalaki nang madamay at siyang sumalo sa bala na para sa kaibigan sa Sta. Mesa, Maynila, kahapon ng madaling-araw.
Apat na bala ang tinamo sa katawan ni Jeffrey Futo, residente ng Cattleya St., Old Sta.Mesa, Maynila.
Sugatan ang kaibigan nitong si Kevin de la Cruz, 24, buy and sell businessman at residente ng Lakas St. Bacood, Sta. Mesa.
Nakatakas naman ang hindi pa kilalang gunman at isa pang kasamahan.
Naganap ang insidente dakong alas-3:00 ng madaling-araw sa panulukan ng Damka St. at Old Sta. Mesa.
Bago ang pamamaril, ang kaibigan ng biktima na si Dela Cruz ay nagbebenta umano ng dalang motorsiklo nang dumating ang suspect na sinasabing tumutok sa kanya ng baril.
Upang makaiwas si Dela Cruz, nagmamadaling pinaandar nito ang motorsiklo at tinangkang paharurutin subalit nawalan ng kontrol kaya gumulong kasama ang motorsiklo.
Nang makatayo, tumakbo na lamang at pumunta sa kaibigang si Futo at isang Eddie Lara na noon ay nakatayo sa Ledy’s Internet Café sa lugar.
Tinanong umano ng biktima kay De la Cruz kung ano ang nangyari subalit habang nagpapaliwanag ay isa sa kasama ng suspect ang sumuntok kay Futo.
Ang suspect na may hawak ng baril ay nagpaputok ng sunud-sunod sa ere dahilan para magpulasan ng takbo sa iba’t ibang direksiyon ang magkakaibigan.
Minalas na si Futo ang nakorner kaya siya ang pinagbabaril ng apat na beses na naging sanhi ng kanyang kamatayan habang mabilis namang tumakas ang mga suspect.