MANILA, Philippines - Masusing imbestigasyon ngayon ang isinasagawa ng mga awtoridad sa pagkaipit mag-isa umano ng isang pahinante sa forklift na matagpuang patay kahapon ng umaga sa loob ng compound ng TFO Trucking sa Balut Tondo, Manila.
Nakilala ang biktimang si Christopher Jacildo, 37, binata, tubong Bacolod City, helper at stay in sa TFO Trucking sa Compound ng 2165 E. Rodriguez St., Balut Tondo.
Sa isinumiteng report ni Det. Amelito Lopez kay P/Sr. Insp. Esmael dela Cruz, hepe ng Manila Police District-Crime Against Persons Investigation Section, natuklasang patay ang biktima ng dakong-6:30 ng umaga sa loob ng compound.
Nabatid na nakipag-inuman ang biktima sa kanyang mga kaibigan sa labas ng compound at natapos umano ito ng bandang alas-4:00 ng hapon, nitong nakaraang Sabado.
Nagulat na lamang ang pinsan nitong si Raymundo Tupas, 56, forklift operator at residente ng Road 10 sa Moriones St., sa Tondo, nang madiskubre nito ang biktima na nakaipit ang katawan sa tagiliran ng forklift.