MANILA, Philippines - Ipinakulong mismo ng kanyang amo ang isang katulong matapos na ibigay ang isang milyong pisong halaga ng pera at mga alahas ng una sa sinasabing miyembro ng ‘Dugo-Dugo Gang’ sa Tondo, Maynila.
Pinipigil ngayon sa MPD-TRS ang katulong na si Estrella Castillo, 44, ng Dasmariñas, Cavite, stay-in sa Echelon Tower Mabini St., Malate.
Ayon sa pulisya, dawit bilang accomplice sa kaso si Castillo dahil sa pakikipagtransaksiyon at pagbibigay ng pera at alahas ng kanyang among si Carissa Gel sa isang suspect na miyembro ng nasabing grupo.
Duda umano ang pulisya sa pahayag ni Castillo na hindi niya alam ang kanyang ginawa lalo pa at hindi na siya menor-de-edad upang magkamali.
Paliwanag ng maid, may tumawag sa kanya at sinabing nasa presinto ang kanyang amo na naka-aksidente at kailangan ng pera.
Nakiusap pa aniya sa kanya ang amo at inutusan siyang kunin ang pera sa vault, saka dalhin sa Ospital ng Tondo.
Pinapalitan din aniya ang kanyang SIM card ng Globe para maging maayos ang kanilang transaksiyon ngunit pagdating niya sa nabanggit na ospital ay pinapunta naman daw siya sa harap ng simbahan ng kung saan siya sinalubong ng isang lalaki.
Pagkakuha aniya sa kanya ng mga alahas at salapi na ibinalot sa makapal na tela ay sinabihan aniya siya ng lalaki na maghintay doon subalit makaraan ang kalahating oras ay sinabihan daw siya ng lalaki na umuwi na at susunod na ang kanyang amo.
Nagulat naman umano si Gel nang dumating sa bahay at nagkalat ang kanilang gamit kaya naman nang dumating ang katulong ay agad niyang ipinadampot ito sa pulisya.