MANILA, Philippines - Patay ang isang welder matapos makuryente habang nagkakabit ng kisame sa isang condominium sa Makati City kamakalawa.
Dead-on-arrival sa Makati Medical Center ang biktimang si Julius Navor, 48.
Ayon sa pagsisiyasat ng Makati City Police, naganap ang insidente dakong alas-4:10 ng hapon sa ika-40 palapag ng One Pacific Place sa H.V. Dela Costa Street, Salcedo Village ng nabanggit na lungsod.
Agad na dinala sa nabanggit na ospital ang biktima ngunit sinawimpalad na binawian din ng buhay.
Nagsasagawa ng imbestigasyon ang awtoridad sa nasabing insidente.