MANILA, Philippines - Isang bangkay ng hindi pa nakikilalang lalaki ang natagpuan sa tubig-baha sa likod ng Philippine Post Office sa Ermita, Maynila, kahapon ng umaga.
Inilarawan ang biktima na nasa edad na 30-35, katamtaman ang pangangatawan, at nakasuot ng itim na short pants.
Sa ulat ni SPO2 Glenzor Vallejo, dakong alas-6:15 ng umaga nang matagpuan ang bangkay sa Muelle del Rio St., malapit sa Jones Bridge Lawton, Ermita, Maynila.
Nagsasagawa ng clearing operation ang mga tauhan ng MPD-Station 5 nang madiskubre ang bangkay ng lalaki.
Nakalutang umano sa hanggang tuhod na baha ang katawan ng lalaki na wala naman nakitang kahit na anong sugat at hinihinalang namatay dahil sa taglay na karamdaman.
Inilagak naman sa St. Yvan Funeral Parlor ang bangkay ng biktima para sa awtopsiya at safekeeping.