Mga opisyal ng MPD sinabon ni Mayor Lim

MANILA, Philippines - Sinabon kahapon ni Manila Mayor Alfredo S. Lim ang mga opisyal ng Manila Police District (MPD) dahil sa san­tambak na reklamo ka­ugnay sa mga vendor na sumasakop sa kalsada kung saan nagsisikip ang daloy ng trapiko.

Sa command con­ference kahapon ng umaga­, binalaan ni Lim ang mga opisyal na hindi siya mangingi­ming sibakin kahit linggu-linggo­ o araw-araw.

 “Pagod na ‘ko sa kakaulit-ulit sa pagsasabi sa mga opisyal na ayu­sin at pangalagaan ang kanilang nasasakupan dahil sila naman ang nagpapatupad ng batas at ordinansa,” pahayag ni Mayor Lim.

“I’m already fed up. This is a fair warning. Kahit magpalit tayo ng commander every week o everyday, I will do that. Pagod na ko kakasabi sa inyo. Natutuyo na laway ko sa inyo,” dagdag pa ni Lim.

Hindi umano pu­puwede ang ‘on-off’ basis na ang pagpapatupad ng batas ay maya-maya lang ay hindi na naman tulad ng CM Recto sa Binondo na minsan umano’y malinis o zero vendor at minsan naman ay nagbalikan na naman ang mga vendor sa lugar na ipinagbabawal.

Hindi naman umano niya, tinanggalan ng pang­kabuhayan ang mga vendor dahil maari silang magbenta sa pamama­gitan ng  mobile pushcarts upang hindi naka­istasyon sa isang lugar o pwesto sa bangketa na may sukat lamang na one by one, simula alas-6 ng gabi.

Subalit ang pinapayagang sukat ng stalls ay nakikitang mas malalaki, may bubong, may kurtina at nasasakop na ang kalsada kahit hindi pa oras ng pagtitinda, na ginagawa pang mistulang bahay.