Dear Dr. Love,
Tawagin mo na lang akong Martha, 75 at isang biyuda. Mula nang mamatay ang asawa ko ay nag-iisa na lang ako sa aming bahay kasama ang dalawang kasambahay.
Mabuti at may naiwang malaking halaga ang mister ko sa akin pati na ang investment namin sa dalawang kompanya na siyang bumubuhay sa akin.
Nang ma-stroke ako, kumuha ako ng caregiver na siyang nag-aalaga sa akin for three years now. Mabait siya, maalaga at makisig.
Naisip ko na since wala akong anak, kanino ko iiwanan ang kayamanan ko?
Pangit ma’ng tingnan, iminungkahi ko sa caregiver ko na magpakasal kami dahil type ko naman siya.
Napahiya ako nang tanggihan niya ang alok ko. Hindi raw siya ang tipong magsasamantala sa isang matandang mayaman na gaya ko.
Buong galang siyang nagbitiw at lihim akong lumuha.
Isang babaeng nurse ngayon ang nag-aalaga sa akin. Ano ang gagawin ko?
Kanino ko iiwanan at ipamamana ang kayamanan ko?
Martha
Dear Martha,
Wala ka mang sariling anak, I’m sure may mga malalapit kang mga kamag-anak.
Piliin mo ‘yung mga higit na nangangaila-ngan sa kanila at hati-hatiin mo sa kanila ang yaman mo.
Mayroon ding mga charity institutions na puwede kang magdonasyon kung hangad mo ang makatulong sa kapwa.
Hanga ako sa binatang caregiver mo. Kung sakim siya, hindi ka magdadalawang salita sa inialok mong kasal.
Dr. Love