Konting tiis pa

Dear Dr. Love,

Ang mag-alsa balutan, ito ang una kong naisip para matigil na ang panlalait ng mga kamag-anak ng misis ko sa akin.

Tiniis kong lahat ang mga salita nila. Mahirap pala talaga kapag hindi nakapagtapos ng pag-aaral. Ang akala nila bobo ako at tamad.

Anim kaming magkakapatid at ako ang panganay, kaya ako ang nagsakripisyo para makapagtapos ng high school ang mga kapatid ko. Walang nakapag-college sa amin.

Nakikitira lang kami sa bahay ng magulang ni misis, kaya lagi niya akong pinapaalalahanan na konting tiis pa at makakaahon din kami.

Laking dagok ng pag-aasawa ko nang maaga at walang kaplano-plano sa buhay.

 Egay

Dear Egay,

Pasalamat ka sa Diyos at nakapangasawa ka ng mabait. Pakinggan mo siya, na konting tiis pa. Huwag kang mawalan ng pag-asa. Patuloy kang magsikap, pasasaan ba at makakaraos din kayo. Alalahanin mo ang kinabukasan ng iyong mga anak.

DR. LOVE