Dear Dr. Love,
Tawagin mo na lang po akong Sexy Susan. Matagal ko nang gustong humingi ng payo sa iyo kung paano ko masasabi sa aking asawa na madalas ay wala akong ganang makipagsiping sa kanya, mas gusto kong matulog na lang dahil sa pagod sa trabaho.
May tatlong anak kami sa loob ng wala pang sampung taong pagsasama bilang mag-asawa pero habang nagkakaedad ang mister ko ay hindi siya kumukupas pagdating sa sex. Nang minsan tanungin ko siya kung hindi ba siya napapagod sa pakikipagtalik, sinabi niyang dapat ipagpasalamat ko ‘yun dahil hindi siya nagbabago gaya ng aming first night makaraang makasal.
Ang sabi rin ng mga kaibigan ko ay ikatuwa ko iyon dahil nananatiling Sexy Susan ako sa paningin ng aking asawa kahit na tumaba na ako. Gusto ko po itanong kung normal po ba sa isang babae na gaya ko na manghinawa sa pakikisiping sa mister ko? Matino po akong babae at ang tanging lalaki sa buhay ko ay ang asawa ko.
Isa pa pong dahilan kung bakit umiiwas akong sumiping sa aking asawa ay para hindi na masundan ang aming ikatlong anak. Karaniwang empleyado lang po kami pareho at hindi na namin makakayanan na dagdagan pa ang aming mga anak.
Payuhan mo po ako Dr. Love dahil ayaw ko namang maging dahilan ang kawalan ko ng gana sa sex para maghanap ng ibang babae ang asawa ko.
Maraming salamat at hintay ko po ang katugunan ninyo.
Gumagalang
Sexy Susan
Dear Sexy Susan,
Kasama sa mga obligasyon ng mag-asawa ay bigyan ng kaligayahan ang bawat isa at kabilang ang intimate moment dito. Kaya mas mabuti na kung may araw na pagod ka, sikapin mo na makabawi sa susunod na araw sa iyong mister.
Kung ang pinangangambahan mo naman ang maaaring muling pagbubuntis, makakatulong ang contraceptives para maiwasan ito. Hingin mo ang rekomendasyon ng iyong health care provider para maging tugma ito para sa inyong mag-asawa. Mahalaga na mapanatiling maligaya ang pagsasama ng mag-asawa. Ang sabi sa mga research, nakakatulong ang intimate moment para mapanatiling mukhang bata at masigla ang mag-asawa. Ikaw rin.
DR. LOVE