Puwede pang umurong

Dear Dr. Love,

Hi and hello to you at sa legions of readers mo. Please call me Conie and I am 22 years old. Five months from now, nakatakda na akong magpakasal sa isang lalaki na hindi ako sigurado kung talagang mahal ko.

Ganito kasi ang nangyari. May boyfriend ako noon na nabalitaan kong may ibang girlfriend. Para pasakitan ko siya ay sinagot ko ang ibang manliligaw ko. Ito nga ang pakakasalan ko nga­ yon. 

Sa totoo lang, wala akong feelings sa lalaking ito at kung umoo man ako sa proposal niyang magpakasal kami, ito’y dahil lamang sa galit sa dating boyfriend ko.

Wala pa namang pormal na paghahanda para sa kasal namin. Puro planning pa lang ang ginagawa namin.  Puwede pa ba akong umurong?

Conie

Dear Conie,

Puwedeng-puwedeng umurong Conie. Mas masama kung magkakatulu­yan kayo at sa katagalan ay lumantad ang katotohanang hindi mo pala siya talaga gusto.

Siyempre, masasaktan siya kapag umurong ka. Pero mas mabuti na ang minsanang sakit kaysa habambuhay na kalbaryo sa pagsasama ninyo bilang mag-asawa.

Sana ay naging leksyon sa iyo ang ginawa mo at huwag na sanang mauulit pa. Madalas, ang padalus-dalos na desisyong hindi pinag-isipan ay nagbubunga lamang ng kapahamakan.

Dr. Love