Mapaglaro

Dear Dr. Love,

Una sa lahat ay ang aking pangungumusta sa iyo na paborito kong kolumnista sa larangan ng pag-ibig.

Tawagin mo na lang akong Cesar, 31-anyos at binata pa. Sa edad kong ito’y single pa rin ako dahil mapaglaro ako sa pag-ibig. Akala ko lahat ng babae ay pare-parehong parausan lang.

Akala ko hangga’t maraming nabibiktimang babae ang isang lalaki ay tulad ito ng medalya ng karangalan.

Wala pa akong niligawan na hindi ko nakukuha. Hanggang sa makilala ko si Remy. Noong una’y maganda ang pakikitungo niya sa akin. Ito ay nang ‘di pa ako nagtatapat.

Pero nang nagtapat ako sa kanya. Umasim ang mukha niya at tahasang sinabi sa akin na huwag siyang iparis sa mga babaeng nabiktima ko.

Nagtiyaga akong manligaw pero sabi niya, wala akong maaasahan dahil may boyfriend na siya. Na-challenge ako Dr. Love. Damdam ko’y siya na ang babaeng dapat kong seryosohin.

Ano ang gagawin ko?

Cesar

Dear Cesar,

Ang masasabi ko’y magtiyaga ka. Naka­tagpo ka ng babaeng katapat mo. Tingin ko’y ibinigay siya ng Diyos sa iyo para buwagin ang napaka­taas mong pride.

Patunayan mo sa kanya na nagbago ka na at siya lang ang babaeng tunay mong minahal.

Hindi ko alam kung maniniwala siya sa iyo dahil sa sira ang iyong kredibilidad dahil kilala kang playboy.

Basta’t pagtiyagaan mo lang at kung mabigo ka, harapin mo ang pagkatalo.

Dr. Love