Magulang na biyenan

Dear Dr. Love,

Noong buhay pa po ang aking asawa, may loteng itinoka sa kanilang magkakapatid. Buhay pa rin noon ang biyenan kong lalaki.

Ang nasabing lote ang pinatayuan namin ng bahay kung saan kami nanirahan. Pero nang mawalan ng trabaho si Cesar kala­unan ay nag-resign na rin ako dahil hindi sapat ang aming kabuhayan para sa pagtataguyod ng lima naming anak. Umuwi kami sa Bisaya at doon naghanap ng kabuhayan.

Nakapasok ako sa munisipyo habang kahit driver ng government agency ay pinatos na ni Cesar. Ang bahay namin sa Quezon City ay pinaupahan namin. Ang problema ay hindi nakakarating sa amin nang buo ang bayad sa upa dahil nagagamit ng biyenan kong babae.

Lalong tumindi ang problema dito nang lumobo ang pangangailangan namin sa pera para pantustos sa pagkakasakit sa atay ni Cesar. Ipinakiusap ko sa aking biye­nan na ipadala niya ng buo para ma­ipambili ng gamot ng aking asawa. Nangyari ito, Dr. Love pero sa loob lang ng ilang buwan, ang katwiran niya ay gipit din daw siya sa pera.

Dumating pa sa punto na isinanla ng aking­ biyenan ang lote. Kaya nang magka­gipitan na dahil binawian na ng buhay si Cesar, pinayuhan ako ng isa sa mga kapatid ng aking asawa na ibenta na lang ang lote total nakasanla na, para maipambayad ko sa mga pinagkautangan ko sa hospital bills at ginamit na pampalibing kay Cesar.

Pero sinabi ng biyenan ko na nakapa­ngalan sa kanya ang lote at hindi niya ito ibe­­benta. Ang sama ng loob ko, Dr. Love. Sad­yang magulang talaga ang biyenan kong babae kung kaya’t pati mga kapatid niya ay sawa nang tumulong sa kanya.

Ngayong patay na ang aking asawa, na­ngangahulugan po ba na wala nang kara­patan ang mga anak ko sa dapat sana’y ma­mamana ng kanilang ama? Puwede po bang maghabol ako para sa kapakanan ng mga naiwang anak ni Cesar?

Payuhan mo po ako.

Lubos na sumasainyo,

Benilda

Dear Benilda,

Sa pagkakaalam ko kung kanino naka­pangalan ang property, siya ang may kara­patan. Maaaring sa lote wala kayong mahahabol pero sa bahay, dahil ito ay ipinundar ninyo ni Cesar, maaaring ma-claim n’yo. Dahil usaping legal na ito, sumangguni ka sa isang abogado para sa mas detalyadong impor­masyon na makakatulong sa problema mo.

Dr. Love