‘Alyansa’ susuyuin mga botante sa Cavite, Laguna

MANILA, Philippines — Isang malaking campaign rally ang isasagawa ng administration-backed Alyansa Para sa Bagong Pilipinas sa Lalawigan ng Cavite ngayong araw, Marso 21 para sa midterm elections sa Mayo.

Susugod ang “Alyansa” senatorial ticket sa Cavite, na may pinakamalaking voting population sa bansa.

Mayroong 2,447,362 rehistradong botante, ang Cavite ay nagsisilbing krusyal na battleground tuwing mayroong national election kaya kritikal na campaign stop ito ng “Alyansa”.

Tatlo sa senatorial bets ng “Alyansa” ay “anak ng Cavite” kabilang sina reelectionist Senators Ramon “Bong” Revilla Jr. (Bacoor) at Francis “Tol” Tolentino (Tagaytay), maging si former Senator Panfilo “Ping” Lacson (Imus), para bigyan ng hometown advantage ang koalisyon sa naturang probinsiya.

Ang malalim na pinagmulan nina Revilla, Tolentino at Lacson sa Cavite, kasama ang kanilang subok at epektibong public service ay inaasahang magbibigay ng positibong ayuda para sa “Alyansa” habang nalalapit ang midterm polls. 

Binigyang-diin ni Navotas City Rep. Toby Tiangco, campaign manager ng koalisyon, na napakahalaga ng suporta na magmumula sa mga botante ng Cavite para makamit ang tagumpay sa isang national election.

Kinabukasan, Marso 22, magtutungo naman ang powerhouse Senate slate sa Santa Rosa, Laguna upang makisalamuha sa mga mamamayan ng isa sa pinakamabilis ang pag-unlad na lugar sa bansa. Mayroong 2,140,124 rehistradong botante, ang Laguna ay krusyal na battleground para sa midterm polls sa Mayo.

Bumubuo sa “Alyansa” ticket sina dating Interior Sec. Benhur Abalos, Makati City Mayor Abby Binay, Sen. Revilla, Sen. Pia Cayetano, dating Sen. Lacson, Sen. Lito Lapid, Sen. Imee Marcos, dating Sen. Manny Pacquiao, dating Senate President Vicente “Tito” Sotto III, Sen. Tolentino, ACT-CIS Rep. Erwin Tulfo at Deputy Speaker Camille Villar.