MANILA, Philippines — Gagamit na ng AI ang PAGASA sa weather forecast.
Ito ang sinabi ni Department of Science and Technology (DOST) Secretary Renato Solidum kung saan makikipagsabayan na umano ang PAGASA (Philippine Atmospheric Geophysical Astronomical Service Administration) sa ibang bansa para sa pagtaya ng panahon.
Sinabi ni Solidum, sinimulan na ng PAGASA Advanced Science Technology Institute at ng Aqua Incorporated, isang AI weather company mula sa Amerika, ang paggamit ng AI para sa mas mahabang pagtaya ng panahon mula limang araw hanggang 14 na araw.
Kasama sa ginagawa aniya ay ang pag-zoom in ng datos para sa mga lugar sa Pilipinas upang mas mapabuti ang pagtaya ng panahon.
“Iyong paggamit ng AI sa weather forcasting ay sinimulan na natin. Gusto nating mabigyan ng forecast na mas mahaba, from 5 days to 14 days,” ani Solidum.
Maglulunsad din ang DOST ng bagong programa na tatawaging Eleva8 Philippines, na layuning palakasin ang bansa sa paggamit ng artificial intelligence sa mga imprastraktura ng DOST at pagtatatag ng artificial intelligence hubs.
Gagamit din ang gobyerno ng AI sa iba’t ibang sektor tulad ng agrikultura, health sector, manufacturing at maging sa state universities sa bansa.
“Uunahin natin ang buong DOST system pero gagamitan natin ng analytics at AI. Ang tawag ko diyan Geospatial Analytics and Technology Solutions Program. So after analytics, gagawa ka ng solusyon doon,” dagdag pa ni Solidum.