40 socmed personalities ‘gigisahin’ sa fake news

MANILA, Philippines — Inimbitahan ng tri-committee ng Kamara ang 40 social media personalities sa isasagawang imbestigasyon kaugnay ng fake news at pagpapakalat ng disinformation sa bansa.

Itinakda ang pagdinig bukas, Pebrero 4, ng Committees on Public Order and Safety, Public Information at Information and Communications Technology.

Sinabi ni Laguna Rep. Dan Fernandez, mamumuno sa pagdinig na mahalaga na maprotektahan ang mga Pilipino laban sa mga peke at mapanlinlang na impormasyon na nagreresulta sa pagkakahati-hati ng bansa.

Ang 40 inimbitahang mga resource persons ay malakas ang impluwensiya sa social media platforms, sangkot sa diskurso sa pulitika, pag-aanalisa ng mga balita at komentaryo sa online.

Kabilang sa mga ito sina Malou Tiquia, Jose Yumang Sonza, Krizette Lauretta Chu, Mark Anthony Lopez, Allan Troy “Sass” Rogando Sasot, MJ Quiambao Reyes, Vivian Zapata Rodriguez, Ethel Pineda, Lorraine Marie Tablang Badoy-Partosa, Jeffrey Almendras Celiz, Lord Byron Cristobal (Banat By), Alex Destor (Tio Moreno), Aaron Peña (Old School Pinoy), Glen Chong, Manuel Mata Jr. (Kokolokoy), Ross Flores Del Rosario (Wazzup Philippines) at iba pa.

Inimbitahan din sa pagdinig ang mga kinatawan ng Google, Meta (Facebook), ByteDance (TikTok), National Bureau of Investigation, Philippine National Police at Department of Justice.