MANILA, Philippines — Rumesponde ang Malasakit Team ni Senator Christopher “Bong” Go sa Binangonan, Rizal at nagdala ng agarang tulong sa mga pamilyang naapektuhan ng Bagyong Kristine sa Barangay Libis, Calumpang, at Tayuman.
Tiniyak ng senador, na kilala bilang Mr. Malasakit, ang kanyang patuloy na serbisyo sa mga komunidad na nasalanta ng kalamidad at mga nangangailangan.
Namahagi ang Malasakit Team ni Go ng 300 grocery packs sa mga biktima ng bagyo. Bukod dito, nagsagawa ang team ng feeding initiative, sa pamamagitan ng pamamahagi ng maiinit na pagkain upang maibsan ang gutom at mapasigla ang espiritu ng mga apektadong pamilya.
“Sa panahon ng sakuna, importante ang pagkakaisa at mabilis na pagtugon upang matiyak na may sapat na pagkain at tulong para sa ating mga kababayan,” ani Go.
“Patuloy tayong magmalasakit sa kapwa sa kabila ng mga hamon upang makabangon ang bawat pamilya at ang buong komunidad.”