MANILA, Philippines — Isang pang weather disturbance ang namataan ng PAGASA sa silangan ng Philippine Area of Responsibility (PAR) Region na nagbabantang maging bagyo na tatawaging Leon.
Kaugnay nito, paglabas ng PAR ng bagyong Kristine ngayong Biyernes ng hapon, Okt. 25 ay posibleng magpaikot-ikot ito sa may West Philippine Sea at maaaring bumalik ng PAR sa araw ng Linggo o Lunes depende sa epekto dito ng LPA na nasa silangan ng Mindanao na inaasahang magiging tropical depression sa susunod na 24 oras.
Maaari rin umanong muling lumakas si “Kristine” habang nasa ibabaw ng WPS.
Alas-2 ng hapon kahapon, October 24, ang sentro ni Kristine ay namataan ng PAGASA sa coastal waters ng Santa Cruz, Ilocos Sur taglay ang lakas ng hangin na umaabot sa 95 km bawat oras at pagbugso na 115 km bawat oras.
Dulot nito, nakataas ang Signal number 3 sa Benguet, Ilocos Sur, La Union, at Pangasinan.
Signal number 2 sa Metro Manila, Nueva Ecija, Tarlac, Zambales, Bataan, Pampanga, Bulacan, Rizal, Cavite, western portion ng Batagas, Northern Portion ng Quezon sa General Nakar, Infanta kasama na ang Polillo Islands at Lubang Islands gayundin sa Ilocos Norte, Batanes, Cagayan kasama na ang Babuyan Islands, Isabela, Quirino, Nueva Vizcaya, Apayao, Kalinga, Abra, Ifugao, Mountain Province at Aurora.