VP Duterte ipaliwanag ‘under oath’ confidential funds, renta sa safehouses

MANILA, Philippines — Hinamon nitong Sabado ng mga kongresista si Vice President Sara Duterte na ipaliwanag ‘under oath’ kung saan ginasta ang milyon-milyong confidential funds at sobrang mahal na renta ng mga safehouses na walang mga dokumento.

“We are still waiting for the Vice President to explain the need for 34 safehouses in less than two weeks. The public has a right to know why P16 million of their money was spent so dubiously,” ayon kay House Assistant Majority Leader Paolo Ortega.

Ipinunto ni Ortega na ang hindi pagbigay ni Duterte ng malinaw na mga sagot tungkol sa mga safehouse at ang kahina-hinalang paggamit ng mga aktibidad ng AFP bilang pangtakip ay lalong  nagpapa-init sa tanong kung sana napunta ang pondo. Binigyan diin ng mambabatas ang kahalagahan na humarap na si Duterte sa pagdinig, manumpa na magsasabi ng totoo at ihayag kung papaano nito ginastos ang pondo.

Sa pinakahuling pagdinig ng Committee on Good Government ay nabuking  na ginamit ng DepEd sa ilalim noon ni Duterte, ang sertipikasyon mula sa Armed Forces of the Philippines upang palitawin ang paggastos ng P15 milyong halaga ng confidential funds sa Youth Leadership Summit (YLS) pero sa testimonya ng mga opisyal ng militar, inilahad ng mga ito na kanya-kanyang gastos at zero o walang ibinigay na pondo para dito si VP Sara.

Ikinaalarma naman nina House Deputy Majority Leader Jude Acidre at House Assistant Majority Leader Paolo Ortega ang impormasyong ito na lumabas sa pagdinig.

“This is not just about accounting errors; this is deception. Using the military to cover up the improper use of confidential funds is an egregious act,” saad pa ni Acidre.

Bukod pa rito, siniyasat din ng komite ang paggastos ng Office of the Vice President (OVP) ng P16 milyon para sa renta ng mga safehouse sa loob lamang ng 11 araw noong 2022. Ilan sa safehouses ay nagkakahalaga ng P90,000 kada araw habang meron ding P1 milyon.