Habang may naghihirap, ayuda ng pamahalaan ‘di titigil – Tulfo

MANILA, Philippines — Anong kakainin o ipapakain sa pamilya nya kung hindi aayudahan ng gobyerno?”

Ito ang sinabi ni ACT-CIS Rep. Erwin Tulfo sa isang radio interview hinggil sa usapin ng ayuda ng pamahalaan.

Natanong kasi si Cong. Tulfo na “hindi kaya tinuturuan ng pamahalaan ang mga mahihirap na maging tamad dahil lagi na lang binibigyan ng ayuda”?

“Hindi po lahat ng tao masuwerte. Meron kahit anong sipag at tiyaga ay malas pa rin dahil marahil hindi nakapagtapos o walang makuhang trabaho,” anang House Deputy Majority leader na si Tulfo.

Dagdag pa ni Cong. Tulfo, maraming ayuda ang pamahalaan gaya ng Tulong Panghanap Buhay para sa mga Displaced Workers (TUPAD) ng Department of Labor para sa mga nawalan ng trabaho pansamantala.

At doon sa walang hanapbuhay ay maaring mag-apply ng Sustainable Livelihood Program o SLP ng DSWD. Medical assistance for indigent persons o MAIP naman ng DOH para sa mga nagkakasakit na mahihirap na kababayan.

Nariyan ang kilalang Pantawid ng Pamilyang Pilipino Program o 4Ps para sa mga mahihirap na may mga anak na nag-aaral at ang Ayuda para sa Kapos ang Kita (AKAP) ng DSWD.

“Lahat kasi ng ito ay pangako ng Pangulo na walang maiiwan sa pagbangon ng bansa sa kahirapan,” pahabol pa ng mambabatas.