MANILA, Philippines — Nanawagan ang isang Obispo ng Simbahan Katoliko sa mga kakandidato ng 2025 midterm elections na iwasan ang paggamit ng plastic campaign materials na makakasira sa kalikasan.
Sinabi ni Tagbilaran Bishop Alberto Uy na mahalagang ikunsidera ng mga nais magserbisyo sa publiko na pinangangalagaan din nila ang kapaligiran.
“An essential aspect of public service is caring for the environment. I urge all candidates for public office to thoughtfully choose biodegradable cloth tarps instead of plastic ones,” ani Bishop Uy.
Dapat na ipakita ng mga kakandidato ang kanilang political will sa panahon ng kampanya sa pagbibigay ng pansin sa kasalukuyang sitwasyon ng mundo na nahaharap sa matinding epekto ng climate change.
Nabatid na sa Oktubre 1 hanggang Oktubre 8 na ang itinakda ng Commission on Elections(Comelec) na paghahain ng certificate of candidacy (COC) para sa halalan sa susunod na taon.
Ang 90-day campaign period ng national candidates ay sa Pebrero 11, 2025 habang sa Marso 28, 2025 naman ang 45-day campaign ng local candidates.